Chaar Shabd

jo chaar shabd main har pyaar ke naam likhta
toh shabdon mein piroyi anginat subah aur shaam likhta
naam ke naam pe mera hai hi kya abhi
varna tu galib ke baad mera hi naam likhta

pyaar mein dil yeh girta hi raha
main khumaari mein khushnumaai mein firta hi raha
yeh nasha likha upar waale ne mere haq mein
na likhta toh jaane kitne jaam likhta
jo chaar shabd....

kai bhulaane laayak vakiye the, bhula bhi gaye
kuch yaad mein reh gaye rula bhi gaye
kuch jagaaye rakhe kuch sula bhi gaye mujhe
raaton ka varna kya mukaam likhta
jo char shabd....

main pyaar mein padna chahta tha, pyaar mujh mein pad gaya
sudhaarte sudhaarte dilon ko yeh dil bigad gaya
koi sudhaarne ka dum toh bharta ek baar isey
naam uske main zaaydaad tamam likhta
jo chaar shabd...

silsila silsilon ka ab bhi zaari hai
dhai akshar mein teen duniya saari hein
bimaari ko bimaar ya bimaar ko bimaari hai kaun kahe
jaan pata toh hakeem koi toh aaraam likhta
jo char shabd...