Yeh duniya agar mil bhi jaaye toh kya hai.

duniya ke aseem anant is sagar mein
brahmaan ki adni si is gagar mein
jab baadhon ka bharosa na koi hai ab
toh naav pohonch saahil bhi jaaye toh kya hai
yeh duniya agar mil bhi jaaye toh kya hai

duniya bhar ki vaadiyon ki kaamna kyun karun
bageechon mein kaliyon ki gaadiyon ki kaamna kyun karun
jhulasti vadiyon ke kaantein bhare bageechon mein
kahin ek kali khil bhi jaaye toh kya hai
yeh duniya agar mil bhi jaaye toh kya hai

faulaadi iraadon ka kya fayda
duniyaa badalne ke vaadon ka kya fayda
jab imaan hi doley huein yahan sab ke
toh ek-aadh pahad hil bhi jaaye toh kya hai
yeh duniya agar mil bhi jaaye toh kya hai

asli toh yeh duniya yun bhi nahin
pata nahi mein asli hun ki nahin
aise mein chamtkaron ka bhi mulya kahan
mom se paththar chil bhi jaaye toh kya hai
yeh duniya agar mil bhi jaaye toh kya hai

sabhi toh yahan jhoota khaa rahe hein
paavitra raag par alaape jaa rahe hein
toh kuch maukon par daavat chodna theek toh nahi
khana zara sil bhi jaaye toh kya hai
yeh duniya agar mil bhi jaaye toh kya hai

shreshtam pashu hone ke jashn bade hein
shrishti vijay dhwaj hum liye khade hein
kaafi choohey hein yahan jab mahamaari failaney ko
toh sher dubak bil bhi jaaye toh kya hai
yeh duniya agar mil bhi jaaye toh kya hai

toh kya hai yahan koi sochta nahi
ichchaon ke aage koi pohonchta nahi
jab jeevn fikr ka paryay ban chuka hai
toh kuch der lag kahin dil bhi jaaye toh kya hai
yeh duniya agar mil bhi jaaye toh kya hai