Mein???

sadhu bhi shaitan bhi mein hun
mrityu bhi aur jaan bhi mein hun
na jane hai mujhko koi
aur sabki pehchan bhi mein hun

ant aur shuruaat bhi mein hun
bhor sandhya aur raat bhi mein hun
kaan fadta sannata mein
boli hui har baat bhi mein hun

prithvi mein akash bhi mein hun
tripti mein aur pyaas bhi mein hun
todne vali nirasha hun mein
jodne vali aas bhi mein hun

sadgun mein har dosh bhi mein hun
hansi bhi mein aur rosh bhi mein hun
maan mein samati shanti hun mein
dil dehlata akrosh bhi mein hun

haar bhi mein aur jeet bhi mein hun
ari bhi mein har meet bhi mein hun
tan jhulsati garmi mein hi
khoon jamati sheet bhi mein hun

sheetal jal ghatak aag bhi mein hun
hans bhi mein aur kag bhi mein hun
mat maili ghrina toh hun mein
saf suthra anurag bhi mein hun

mein bhi mein aur tum bhi mein hun
mila hua aur gum bhi mein hun
maan mauji mastana hun mein
aur sada gumsum bhi mein hun

kuch nahi par sab kuch hun mein
mithya hun par sachmuch hun mein
samay, soch, bhagya, bhagvan
aisa kuch ya aur uchch hun mein