Mumbai Nagariya.

Shola hai ya Bijuriya
Mujhe nahi pata
Par gazab hai ye Mumbai nagariya.
Logon ki kami nahi yahan
Aur bhara hua hai har gali-kooncha,
Par andar ke us khalipan ka kya
Jisse joojhta hai yeh shahar samoocha.
Do crore se jyada abadi
Par itna tanha admi kahin nahi dekha
Begano mein apne talashti sooni ankhein
Aur mathe par padi hui chinta ki rekha.
Anishchitta ke andhere mein satat badte kadam
Umeed mein ek nishant ki
Koi kahe chahe kuch bhi
Jaroorat toh sabhi ko hoti hai ekaant ki.
Insaan se zyada zoroori paisa
Aur bade dil se zyada bada naam
Log jeetein hein yahan kaam karne ke liye
Jeenein le liye nahi karte kaam
Bhagam bhag ke aise daur mein
Ruk ke sochne ki kise fikar hai
Kahin bus na choot jaye,train na miss ho gaye
Sabse zyada toh logon ko isi ka dar hai.
Tanav mein doobi is mayanagari ke baarein aur kya kahein
Hum nahi kehte,tathya kehte hein,
Yahan bacche kya aur boodhe kya,sabhi tanav mein rehte hein.
Aseem anant is shehar mein
Lagein sab hein aage nikalne ki hod mein
Par kya sach mein koi vijeta hoga,
Ya harenge sab hi,is andhi daud mein?