zindagi ki sadak pe hum bas yun hi ek bench pe sustaane ko ruke the
humein kya pata tha ki hum kismat ke kaidi ho chuke the
bagal mein aakar tum baithe aur humne gaur bhi na kiya
fir jo gaur kiya toh karte hi gaye, fir kuch aur bhi na kiya
kisi ko aham banana nahi chahte the kyunki khud vikalp banne se darte the
phir bhi na jaane kyun tumhein khila kar hi apna pait bharte the
khair humne kaha khud se ki lag gaye phir tum apni zindagi haathon se apne likhne
kahaa, ruk jaao. mat tayyiyaar raha karo muskuraahton ke mol bikne
par marammat karne koi aur aata dikhaai bhi toh na diya tha
anjaane raaston pe khaali bench ke lamhon ko kabhi humne bhi jiya tha
toh jo haath hum shaan se peeche baandhe tehla karte the, humne badhaaye
voh roothna manaana, raaton ko khana dhoondhte dhakke khana, voh pal bhi khoob bitaaye
jaanne ko jigyaasu, maine tumhe bhi khoob jana, khoob aur jaanna chaaha
tumne mujhe kabhi jaanna hi nahi chaaha, fir bhi 'mujhe khudgarzon se nafrat hai', maine kaha
kyun kaha kyunki main sant nahi hun, main ummeed, apeksha karta hun
main tumhein saalon dunga, par jab mujhe zaroorat ho toh tumhaare ek din ki ummed rakhta hun
tumne poocha mujhse, ki kyun itne achche vartaav ke saath tum mujh par meherbaan ho
maine jawab na diya. hota toh jawaab deta. badle mein maine khud se kaha ki jawaab do
maine fir jawaab....na diya.
chamatkaar hi toh tha, toh chamatkaar ko prashno ke ghere mein kyun daalna
aaj achcha hai toh aaj ko aaj jeelein, aaj hi kyun kal ki soch ko paalna
toh keelein ab humaari khatm ho chali thi, thi kutiya ab humaari marammat ko keelein maangti
vyang yeh hai, ki dard se ummeedein jaagti hein aur ummeedein hein aur dard baant-ti
voh din bhi aa gaya jab khudgarzi ke chaar paath hum bhi seekh baithe hein
jana ki hum uss daur mein aa gaye hein jahan club ke shor mein aap sunna nahi chahte hum jo kehte hein
kya tha kyun tha sab jaan pata toh achcha hota. thoda samay aur bitata toh achcha hota.
dekhne waale kehte hein ki bachkana hai yeh. kaash mein sachmuch bachcha hota
tumse duniya mein halaaki kuch hi din aage hun, par kaamna hai ki duniyadaari mein tum mujhse aage nikal jaao
mere uthne ke baad bench pe agla baithne wala koi kum paagal zyada practical sa saathi paao
jahan tak meri baat hai toh safar zaari rahega yun hi keelein juta-te lagaate huae
haan zindagi ki sadak pe phir shaayad kisi bench pe ab na milun mein sustaate huae
haath kheenchne ka sabak bhi zaroori tha, shukriya ada bhi na kar paya seekhane ke liye
zabaan ka pakka hun toh yeh hai tumhaare liye meri taraf se kavita, bench ke naye saathi ko dikhaane ke liye
